Naireklamo ti maysa a lalaki, addaan iti legal nga edad, ken residente ti San Jose Del Norte, Bulacan gapu iti panangloko nga adda metlaeng pakainaiganna iti Cybercrime Acts.
Linoko ti nasao a lalaki ti maysa nga estudyante nga agtawen iti 22 ken residente ti Bakakeng Central, Baguio City.
Maibasar iti report ti kapulisan, napasamak ti insedente idi Hulyo 3, 2026 ngem naireport laeng daytoy idi Hulyo 27.
Sigun iti report, gimmatang ti complainant iti IPAD A16 nga agatad iti P15,000 manipud iti suspek iti maysa a Facebook marketplace idi Hulyo 3.
Sakbay a nangipatulod daytoy iti bayad na, nagvideo call pay dagitoy ken nakitana ti rupa ti suspek.
Dimmawat pay ti nasao a complainant iti pruweba a maiship ti order daytoy a gadget.
Idi Hulyo 4, nangipatulod ti video ti suspek a mabalbalkod ti item. Malaksid iti dayta, nangipatulod metlaeng daytoy ti ladawan ti National ID na a tugma met iti rupa a nakitana bayat iti video call kasta metlaeng ti kopya ti shipping receipt ti item.
Gapu kadagitoy, namati ti complainant a naiship ti onorderna a gadget isu’t gapunna nga inpatulodna ti bayad na a P15,495 karamanen ditoy ti shipping fee babaen iti GCash Bank Transfer iti BPI Account ti suspek.
Nabagaan nga aguray ti complainant ti dua agingga tallo nga aldaw sakbay a sumangpet ti order na.
Nagturong ti complainant iti LBC branch idiay Central Business District idi Hulyo 7 tapno beripikarenna ti status ti shipment ti order na.
Nupay kasta, idi impakitana ti shipping receipt nga insend kenkuana ti suspek, saan daytoy a malocate ken maverify ti system ti nasao a courier.
Awan metlaeng ti rekord a mangipakpakita a nadispatch ti nasao nga item.
Iti baet dayta, naguray latta ti complainant ti manu nga aldaw bareng sumangpet ti order na.
Nupay kasta, awan ti naideliver kenkuana.
Gapu iti dayta, inawaganna ti suspek iti messenge tapno saludsodenna daytoy ngem naiblock daytoyen.
Iti dayta a gundaway, nagreport ti complainant iti Station ti kapulisan idi Hulyo 27.
Iti kaudian a report dagiti kapulisan, naipila ti kaso nga Estafa in Relation to Republic Act No. 10175 wenno Cybercrime Prevention Act of 2012 idiay City Prosecutors Office ngem awan pay laeng ti docket number daytoy a maitunus iti Department of Justice DC 15 a napetsaan idi Hulyo 16, 2024. //bombokaren.c.sapirao
