Imimbestigaran itan ti Mankayan Municipal Police Station ti napasamak a panagtakaw iti maysa a pagadalan idiay Mankayan itay nabiit.
Iti eksklusibo a pannakiuman ti Bombo Newsteam kenni Pcpt. Jeoffrey Bayading, Station Commander ti Mankayan Municipal Police Station, uppat nga indibidual ti naalaan iti CCTV footage a nangserrek iti Lepanto Elementary School idi rabii ti Agosto 5, 2026.
Inlawlawag ti opisyal nga inidep pay umuna dagiti suspek ti silaw iti pagadalan sakbay nga insayangkatda ti panagtakaw.
Immunli dagitoy iti likod ti gate ti nasao a pagadalan, dinadaelda ti padlock ken sinerrek dagiti suspek ti sumagmamano a klasrum iti pagadalan.
Kinalkal dagitoy dagiti drawers ken daduma pay a mabalinda a makalkal ngem gapu ta awan ti makitada a ‘valuable item’ iti uneg, nagturong dagitoy iti school canteen.
Dita da metten nga inala ti agarup maysa ribo a coins ken 26 a de lata (Spam).
Sakbay daytoy, immuna metten a naserrrek ti Guinaoang Elementary School idi Hulyo babaen kadagiti saan pay a nabigbig a suspek.
Sigun kenni Pcpt. Bayading, agpada ti modus wenno napasamak iti dua a pagadalan ken maatap a menor de edad dagiti indibidual nga ada iti likod ti nasao a panagtakaw.
Nupay kasta, impettengna a saan a konektado ti kaso dagiti dua a pagadalan.
Patien ti nasao nga opisyal a menor de edad dagiti suspek gapu ta saan a naala dagiti desktops ken dadduma pay a nginginaen a banag.
Iti agdama, nakikoordinar metten dagitoy kadagiti barangay officials para iti kanayunan a panagbantay kadagiti pagadalan sadiay tapno saanen a maulit ti napasamak nga insidente.
Umap-apila met ni Pcpt. Bayading iti publiko nga ireportda iti kapulisan nu addaan dagitoy iti anyaman a pudno nga impormasyon a posible a makatulong iti pannakabigbig dagiti suspek.
Iti sabali a bangir, daytoy ti kaunaan a gundaway ita a tawen nga adda ti panagtakaw kadagiti pagadalan sadiay. Nupay kasta, imbinglay ti opisyal nga ada metlaeng dagiti napasamak a panagtakaw idi.
Sigun iti panagresearch ti Bombo Newsteam, napasamak ti panagtakaw idiay Guinaoang National High School idi 2018 no sadino naitaray dagiti laptop ken sumagmamano a cash a dumanon iti P17,308 manipud iti koleksyon ti school canteen, uniform payments, ken personal a kuwarta dagiti mannursuro iti faculty ken principal’s office.
Dagiti suspek iti nasao a panagtakaw ket naglibas babaen iti aramatda a lugan. //via Bombo Noveh Organo
