Nadadael ti nasurok 9,800 a pagadalan gapu iti Habagat ken dagiti bagyo a dimmalapus iti pagilian.
Maibasar iti kaudian a situation report ti Department of Education, dumanunen iti 9,869 ti nadadael a pagadalan iti intero a pagilian.
Iti nasao a bilang, 5,731 ti minor damage; 2,055 ti major damage, ken 2,083 ti totally damaged.
Kaaduan kadagiti nadadaelan dagiti pagadalan iti Central Luzon a 3,732; sinaruno ti Region I a 2,746 ken rehion Cordillera nga addaan iti 1,266.
Pattapatta ti ahensiya a dumanon iti P280 million ti pondo a kasapulanda para iti minor repairs; P 1 Bilyon iti major repairs ken P5.2 bilyon iti rekonstraksyon.
Kabayatanna, nakapasar iti panaglayus dagiti 59 a pagadalan a pakairamanan ti 47 iti Central Luzon bayat nga agarup 1,309 a classroom iti 348 a pagadalan ti maar-aramat paylaeng nga evacuation centers.
