BAGUIO CITY – Natalged ken naballigi ti umuna nga aldaw ti 2026 Bar Examination a naangay iti 15 local testing centers iti pagilian.
Iti Luzon, tallo ti nagserbi kas local testing centers pakairamanan ti Baguio City, Tuguegarao City ken Naga City.
Iti siudad ti Baguio, naangay ti eksaminasyon iti Saint Louis University ngem awan pay ti nairuar nu manu ti pakabuklan a bilang dagiti examinees.
Nupay kasta, maibasar iti pakasaritaan, makaak-akomodar ti Saint Louis University iti 1,100 agingga 1,200 tunggal tawen nu sadino 1,158 ti nag-exam idi 2024 ken 1,200 idi 2025.
Dumanon met iti 441 a police personnel manipud iti Baguio City Police Office, Benguet Police Provincial Office, ken 112 Police Regional Office Cordillera Regional Headquarters ti nangipaay iti seguridad iti aglawlaw ti Saint Louis University tapno maipanamnama ti natalna ken natalged a pannakaipatungpal ti eksaminasyon para kadagiti aspiring lawyers.
Babaen metlaeng iti initiatibo ni PBGEN NOEL B VALLO, Regional Director ti Police Regional Office Cordillera ket maituloy ti panagbantay dagiti pulis agingga iti maika-dua ken maikatlo nga aldaw ti BAR examination a maituloy inton Setyembre 9 ken Setyembre 13. //OIC
