Maipatungpal ti maikatlo a Nationwide Simultaneous Earthquake Drill (NSED), alas-2 ti malem ita nga aldaw iti siudad ti Baguio.
Guyguyugoyen ti City Disaster Risk Reduction and Management Office (CDRRMO) ti publiko pakairamanan dagiti residente, opisina, pagadalan, establisyemiento, ken babbarangay a makipasetda iti nasao a drill.
Sigun iti pablaak ti Baguio City PIO, impetteng ni CDRRMO Department Head Engr. Charles Bryan C. Carame a panggep ti nasao a drill a mapasayaat pay ti earthquake preparedness ken response babaen iti panangpalubos iti komunidad nga iyaplikar dagiti safety and evacuation protocols.
Impetteng na metlaeng a napateg ti ulit-ulit a panangensayo iti Duck, Cover, Hold ken Evacuate protocols iti panang-improve iti muscle memory ti publiko ken panangkissat iti panag-panic kabayatan iti aktuwal a gingined.
Para iti nasao nga aktibidad, mapauni ti City Hall siren nga addaan iti 3 segundo nga interval kas senyales iti dagos a panangipatungpal iti Duck, Cover, and Hold protocol iti agarup 30 segundo.
Para met iti sumaruno nga atidog nga uni ti nasao a siren, senyales daytoy iti dagos a panagbakwit kadagiti naidisignar nga evacuation area wenno kadagiti natalged nga open space.
Nabilin met dagiti focal persons iti tunggal city government office ken barangay a mangsigurado a natalged a nakabakwit dagiti amin a personnel ken residente sakbay nga agreport dagitoy kadagiti Incident Command Posts.
Maimuntar ti city-level Incident Command Post iti baba ti City Hall bayat a nabilin dagiti babbarangay a mangidesignate da met kadagiti bukodda a command posts.
Naorient metten idi kalman ti agarup 128 a barangay iti siudad.
Kagiddan dayta, inalukoyna dagiti residente nangnangruna dagiti agnanaed iti multi-storey buildings a mangipatungpalda iti bukodda nga evacuation exercises.
Innayona ti publiko a tratoen ti publiko ti nasao a drill kas gundaway a panangevaluate iti bukodda a kinasagana ken kitaenda dagiti banag a pagkuranganda babaen iti nasao nga aktibidad tapno ammodanto ti rumbeng nga aramidenda iti kanito nga adda ti mapasamak a gingined.
