Impeksa ni Akbayan Party-list Rep. Chel Diokno a respetuen ti prosecution team ti anyaman a desisyon ti Senate impeachment court mainaig iti voting threshold a maaramat iti impeachment trial ni Vice President Sara Duterte.
Sigun kenni Diokno, saan a naipamaysa ti atensyon ti prosekusyon iti bilang dagiti botos a kasapulan para iti pannakakonbiktar, no di ket iti panangidatag iti natibker nga ebidensya a mangsuporta iti kaso dagitoy kontra kenni Duterte.
Naituding a maangay inton Martes, Setiembre 23 dagiti oral arguments ti prosecution ken ti depensa mainaig iti 16-vote threshold nga agdama a naikeddeng para iti pannakakonbiktar ti bise presidente.
Bimmara ti debate maipapan iti voting threshold kalpasan a kiniddaw ti Senate impeachment court ti opinion dagiti sigud a hues ti Korte Suprema no rumbeng a mairaman dagiti senador a naibalud, aglemlemmeng, wenno adda iti ballasiw-taaw iti panagbilang ti botos.
Tallo kadagiti uppat a legal experts a naimbitaran kas amici curiae ti nangibaga a mabalin a baliwan ti impeachment court ti agdama a 16-vote threshold para iti pannakakonbiktar, maibasar iti bileg ti Senado.
