Bambantayan ita ti PAG-ASA ti maysa a Low Pressure Area (LPA) iti ruar ti Philippine Area of Responsibility (PAR).
Iti pannakiuman ti Bombo Radyo kenni Engr. Larry Esperanza, mangidadaulo ti PAGASA- Baguio, impettengna a dakkel ti tyansana nga agbalin daytoy a Tropical Cyclone ken umuneg iti Philippine Area of Responsibility ita a lawas.
Innayona a daytoy metlaeng iti mangitundtunda iti mapaspasaran a trough kadagiti sumagmamano a paset iti pagilian.
Imbinglayna nga asideg daytoy iti PAR ken iti kanito nga umuneg iti pagilian, maawagan daytoy iti local name a Queenie.
Innayon pay ti nasao nga opisyal nga iti kanito nga agtuloy daytoy nga umuneg, posible nga agland fall daytoy iti Extreme Northern Luzon malaksid nu agbaliw ti direksyon daytoy.
Impetteng ni Engr. Esperanza a maysa kadagiti bambantayada ti pannakapapigsa ti Habagat a mangapekto iti Extreme Northern Luzon pakairamananen ditoy ti rehiyon Cordillera.
Kabayatanna, imbinglay ni Engr. Esperanza a gapu kadagiti nagduduma a weather systems, kinunana a nakatulong ti panagtutudona iti nakaro nga epekto ti El Niño iti pagilian.
Innayonna a manamnama ngamin ti panagkaro ti El Niño iti pagilian iti ngudo ti bulan ti Oktobre iti agdama a tawen no sadino posible pay nga agbalin daytoy kas Strong El Niño agingga iti ngudo ti Disyembre iti agdama a tawen ken umuna a kwarter ti 2027.
Kabayatanna, impeksa ni Engr. Esperanza nga innem a tropical cyclone pay ti manamnama a mapasaran ti pagilian agingga iti ngudo ti tawen gapu pay laeng iti tsansa a maehance ti Southwest Monsoon wenno Habagat. //𝓚𝓒𝓢//
