Permanente a naiparikep ti lima a linked firms ti AUSPHIN Group iti syudad ti Baguio ken Pasig City ita nga aldaw, Setyembre 25, gapu iti illegal recruitment.
Iti siudad ti Baguio, tallo a firms ti naparikep pakairamanan ti AUSPHIN INTERNATIONAL INSTITUTE- CULINARY ARTS & BUSINESS MANAGEMENT INC., AUSPHIN RECRUITMENT, ken AUSPHIN CONSULTANCY idiay Curamed Building, 12 Marcos Highway, BGH Compound, Baguio City bayat nga idiay One Corporate Centre, Julia Vargas Ave., cor. Meralco Ave., Ortigas Center , San Antonio, Pasig City, Metro Manila, dua met a firms ti naiparikep pakairamanan ti AUSKILLS INC ken tu VISUME INC./VISUME APP.
Sigun iti Department of Migrant Workers (DMW), nakaawat dagitoy iti reklamo manipud iti sigud nga employee ti nasao a grupo seknan iti maatap nga illegal recruitment no sadino uppat nga indibidual binigbigda nga adda pakainaiganna iti nasao nga issue.
Inlawlawag ti nasao nga ahensya a ti impormasyon a naawatda ket seknan iti AUSPHIN Group no sadino maatap nga agrecrecruitda nga awan iti umno a dokumento wenno lisensya manipud iti DMW.
Maibasar iti imbestigasyon ti nasao nga ahensya, agrecrecruit ti nasao a grupo iti agbalin a chef wenno cook idiay Australia no sadino agarup P200,000 agingga P250,000 ti maikarkari a sueldoda.
Nupay kasta, nasken nga agbayad nga umuna dagiti awanan iti experience iti agarup P420,000 bayat a P95,000.00 met ti bayadan dagiti addaan iti work experience.
Gapu iti nasao nga imbestigasyon, nangipatungpal metlaeng dagitoy iti namitlo a daras a surveillance (Hunyo 24, Agosto 3, ken Setyembre 15 iti agdama a tawen) no sadino ditoyda a nakumpirmar nga adda iti recruitment a mapaspasamak ken naduktalan nga awanan lisensya ti nasao a grupo maibasar iti beripikasyon dagitoy a nangitunda iti pannakaiyulog ti closure order.
Iti agdama, nakikoordinar metten dagitoy iti lokal a gobyerno ti siudad ti Baguio ken panggepda a mangipaay iti surat para iti rekomendasyon ti pannakawaswas ti permit nga impaay ti lokal a gobyerno iti nasao a grupo kas ti business permit ken dadduma pay.
Malaksid iti dayta, nakikoordinarda metten iti Security and Exchange Commission (SEC) para iti rekomendasyon ti pannakawaswas metlaeng iti permit a naipaay iti AUSPHIN GROUP.
Impeksa ti DMW a mapilaan ti kaso nga illegal recuitment ti makintagikua ti pagadalan kasta metlaeng kadagiti opisyales ti nasao a grupo.
Kabayatanna, dagiti lima a firms/business a nadakamt ket agop-operate kas subsidiaries wenno affiliate companies ti nasao a kompanya.
Sigun met kenni Atty Cheryl Daytec-Yangot , Regional Director ti DMW-CAR ti kangrunaan a biktima ditoy ket dagiti estudyante no sadinno sumagmamano kadagiti estudyante ti saanda ammu nga involved ti illegal recruitment iti nasao a pagadalan.
Gapu ti dayta, guyguyuguyenna dagiti estudyante nangruna dagiti parentes nga agipila iti kaso ken makikoordinarda iti nasao nga ahensya tapnu maasistaran ken matulongan dagitoy nangruna ti pannakarefund ti kuwarta a nabusbusda.
Bayat ngamin ti kaadda ti nasao nga ahensya iti lugar tapno maiyemplementar ti closure, binalakadan ti maysa nga empleyado ti AUSPHIN GROUP dagiti estudyante a saandan a makikatungtong ken diretso nga agawid kalpasan a makapagpirma.
Innayon met ti opisyal a masayangan daytoy iti gastos a nabusbos dagiti estudyante nangruna ta agarup P270,000 ti tuition a baybayadan dagitoy tunggal tawen.
Kabayatanna, iti panagsaludsod ti Bombo Radyo Baguio Newsteam, rumrumuar nga agarup 90 nga estudyante ti maicat-cater ti nasao a pagadalan.
“Grabe ang pinsala ng AUSPHIN sa mga bata”, sigun kenni Atty. Daytec-Yangot.
Mainaig ti dayta, impeksa ni Atty. Daytec-Yangot a rumrumuwar iti imbestigasyon dagitoy a dagiti baybayadan dagiti studyante ket para laeng ti pannakaprocess no sadinno saan a garantisado a makasapulda ti pagtrabahuanda idiay Australia.
Iti sabali a bangir, kagiddan ti pannakaipatungpal ti closure dagiti tallo a business/firms iti siudad, naduktalan ti City Licensing and Business Permit nga awanan ti business permit ti recruitment agency ken ti consultancy office ti AUSPHIN group iti siudad.// via Bombo Vy
