Umap-apila iti tulong dagiti kameng ti pulisya, nangruna kadagiti motorista para iti madama nga imbestigasyon dagitoy panggep iti ipupusay ti maysa a bank department manager a nasarakan iti uneg ti luganna a white toyota innova.
Nakaparada daytoy idiay Kennon Road, Tuba, Benguet idi September 29.
Makidkiddaw kadagiti motorista nga addaan iti dashcam nga ipaayda iti pulisya dagiti footages a naala dagitoy para iti imbestigasyon.
Nangruna dagiti motorista a nagna iti nasao a lugar iti nagbaetan ti 7:00 p.m idi September 28, 2026 agingga 4:00 p.m idi September 29, 2026.
Maipalagip nga idi Sep. 29 iti pasado 4:00 p.m, nadiskubre ti maysa a bangkay iti uneg ti lugan a nakaparada sadiay Kennom road, adaan iti tama ti paltog ti ulo ti biktima.
Iti inisyal nga impormasyon, nagrubwat ken pimmanaw ti biktima iti 7:00 p.m idi Sep. 28 tapnu apan nga agawat iti awardna sadiay Manila.
Nupay kasta, saan a nakasangpet sadiay Manila ken saanen a makontak agingga a napakaamuan dagiti maseknan a pimmusayen daytoy.
Nasarakan ti biktima a nakatugaw iti akin sango a passenger seat.
Narekober manipud iti crime scene ti maysa a Cal. 22 revolver nga awanan iti serial no.
Agtultuloy ti imbestigasyon dagiti kameng ti pulisya seknan iti napasamak nga insidente.//Bombo Noveh Organo
