Kinumpirmar ti Department of Migrant Workers (DMW) idi rabii a naipadamag ti ipupusay ti maysa nga Overseas Filipino Worker (OFW) kalpasan iti maysa nga intercepted drone attack iti maysa nga oil field facility idiay Dammam, Saudi Arabia idi metlaeng kalman.
Sigun iti energy ministry ti Saudia Arabia, panngep ti nasao a drone a puntiryaen ti maysa a pasiliada ti oil field idiay Shaybah ngem gapu iti debris manipud iti nasao nga attack, natamaan ti biktima nga OFW.
Kabayatanna, sigun kenni DMW Secretary Hans Leo J. Cacdac, agtultuloy dagitoy a nakamonitor kadagiti kanayunan a report seknan iti napasamak.
Ginuyugoyna met dagiti amin a Pilipino idiay Saudi nga agbalinda nga alerto ken agtulnogda kadagiti lokal nga otoridad, ken liklikanda pay laeng dagiti lugar a naapektaran iti nasao a panagraut.
