Imbilin ti Office of the Ombudsman ti pannakaipila ti 36 a criminal charges kontra kadagiti innem a tauhan ti Department of Public Works and Highways (DPWH) ken pito a pribado nga indibidual seknan iti maatap a panagkusit a pakairamanan ti P491.9 million a bayad ti road right-of-way sadiay General Santos City.
Karaman kadagiti kaso ti malversation of public funds through falsification of public documents ken panaglabsing iti Anti-Graft and Corrupt Practices Act.
Sigun iti Ombudsman, adda ti 18 a parcels ti lote a maatap a nakaaramatan ti palsipikado a dokumento tapno maala ti bayad ti proyekto a Digos-Makar National Road sadiay Barangay Lagao.
Dagiti respodents ti DPWH ket ti sigud a regional director ti Region 12 (Soccsksargen) a ni Subair Saro Diron, sigud nga assistant regional director Laureano Suan Jr., Tomas Marquez Rodriguez, David Lucena Padlan, Paisal Amerol Padate ken Ansare Mariga Busran.
Dagiti pito a pribado a respondent ket da Wilma Olarte Mamburam, Nelson Ti, Evelyn Parilla Paloso, Rudy Hadji Ong, Marisa Tiongson Seguirre, William Perla Uy ken Paul Michael Pabas Bagio.
Imbilin pay ti Ombudsman ti pannakaikkat iti serbisyo ni sigud a DPWH Region 12 legal officer Ansare Mariga Busran mainaig iti sabali manen nga administrative case.//
