Agtaltalinaed a nakahold ti bilin ti Sandiganbayan a 90 nga aldaw a preventive suspensyon kada Senators Jinggoy Estrada ken Rodante Marcoleta bayat a maururay ti resolusyon kadagiti motion for reconsideration dagitoy.
Sigun kenni Senate President Sherwin Gatchalian, naawaten ti senado ti bilin ti anti-graft court. Nupay kasta, temporaryo a naitantan ti panangipatungpal ti suspesyon bayat a saan pay laeng a naresresolba ti nasao a mosyon.
Innayon pay ni Gatchalian a saanda pay laeng nga ipatungpal ti suspensyon nu naipila ti reconsideration bayat nga awan pay laeng ti pinal a resolusyon seknan iti daytoy.
Kinunana metlaeng a saan a makaawat da Estrada ken Marcoleta iti sweldo gapu ta saanda a makapaset iti senado.
Maipalagip nga inbilin ti Fifth Division ti Sandiganbayan ti 90 nga aldaw a preventive suspension kenni Estrada a sumangsango iti kaso a plunder seknan iti maatap a panangawat iti kickback manipud iti kuwestionable a proyekto ti flood control.
Kabayatanna, imbilin metlaeng ti Third Division ti Sandiganbayan ti kapada a bilang ti aldaw a suspension kenni Sen. Marcoleta seknan iti alegasyon ti panangawat iti P75 Million a donasyon iti kampanya iti daytoy ti agserserbi kas representative ti maysa a partylist.
