Inyuswaten ti Benguet Electric Cooperative (BENECO) ti BENECO Mo Ito, maysa a mobile application a nairanta a mangparpartak iti panag-access dagiti konsumer kadagiti serbisio ti kooperatiba. Impakaammo daytoy ti nasao nga opisina iti naisayangkat a press conference ita nga aldaw sadiay BENECO headquarters.
Babaen iti nasao nga application, mabalin a bayadan dagiti konsumer dagiti bill da iti kuryente ken mamonitorda dagiti billing history ken consumption records da.
Mabalin met iti online payment babaen kadagiti e-wallets ken partner banks a supsuportaran ti application.
Kanayonanna, mabalin metlaeng nga usaren ti app iti panagipila iti outage reports tapno direkta a mai-report dagiti brownout wenno nadadael a linia ti kuryente.
Mabalin met nga isumitir dagiti konsumer dagiti service requests da maipapan iti meter reading, reconnection, ken panagkonektar iti baro a linia ti kuryente.
Malaksid iti dayta, mangipaay ti application kadagiti real-time notifications maipapan kadagiti nakaiskedyul a power outage ken dagiti napateg nga advisory manipud iti kooperatiba.
Masarakan pay iti nasao nga application ti customer support babaen iti chat ken hotline integration tapno mapapartak ti panangipakaammo kadagiti saludsod ken panagkasapulan dagiti konsumer.
Babaen iti daytoy a digital platform, panggep ti BENECO a mangipaay iti nasaysayaat, napartak ken nalaklaka nga access iti serbisio para kadagiti transaksionda.
Maysa daytoy a panagpabileg iti digital services ti BENECO tapno mapapintas ti panagserbi kadagiti konsumer ken maparpartak ti pannakaisayangkat dagiti transaksionda iti kuryente.// via Bombo Khey Reparip
