Inlawlawag ti People’s Budget Coalition a saan a panangikat iti ayuda ti kidkiddawenda nu di ket ti panangbaliw iti sistema ti panangipaay iti daytoy tapno saanen a kasapulan nga umasideg dagiti umili kadagiti politiko.
Iti pannakiuman ti Bombo Radyo, impeksa ni AJ Montesa manipud iti nasao a grupo a napateg ti panangipaay iti tulong kadagiti agkasapulan a pamilya.
Nupay kasta, kinuwestionaranna ti proseso ti panangala iti ayuda no sadino kasapulan nga agpila iti nabayag iti barangay hall ken no sadino kiddawenda pay nu mamingsan ti refferal manipud kadagiti politiko sakbay a maiproseso ti kiddawda.
Sigun keni Montesa, saan a rumbeng nga agpakaasi dagiti umili kadagiti politiko tapno laeng makaawat iti tulong.
Gapu iti daytoy, tarigagay ti grupo nga idagadag ti panakatarimaan ti agdama a sistema tapno mapapartak ti panangala dagiti benepisyaryo iti tulong.
Maipalagip a ti People’s Budget Coalition ket karaman kadagiti civil society groups a nakipaset iti panagdengngeg iti Senate Finance Committee seknan iti 2027 national budget no sadino impakaammo ti nasao a grupo dagiti red flags kadagiti alokasyon seknan iti programa ti ayuda.
