Idagdagadag ni Department of Education Secretary Sonny Angara kadagiti technology ken social media firms nga implementarda ti naing-inget nga age-verification controls ken ikkatenda dagiti bayolente nga online content.
Sigun kenni Angara, umanamong dagitoy iti natibtibker nga addang kontra kadagiti terrorist recruitment groups, ken online groomers.
Kidkiddawen daytoy ti nasao nga opisial, kasaruno ti direktiba ni President Ferdinand Marcos Jr. kadagiti amin nga ahensiya ti gobierno nga agbiruk dagitoy iti solusion tapno marisut dagiti isyu seknan ti school violence iti pagilian.
Gapu iti dayta, nangbukel ti Department of Education (DepEd) iti task force, kaduana ti Department of Information and Communications Technology (DICT) ken Cybercrime Investigation and Coordinating Center (CICC) kontra kadagiti posible a pangta.
Sigun pay kenni Angara, pinasayaat ti ahensiya dagiti learner support, emergency response systems kadagiti pagadalan tapno malabanan dagiti online ken physical threats kadagiti pagadalan iti pagilian.
