Pinagyamanan ni Baguio City Mayor Benjamin Magalong ti national government ken ni President Ferdinand Marcos Jr. gapu iti pannakaipaay ti ₱10-milion a tulong para iti panagbagon ken rehabilitasyon dagiti naapektaran a pasilidad ken lugar iti siudad.
Daytoy ket kalpasan a naipasigurado ti pannakaipaay ti Disaster and Recovery Aid manipud iti national government a maaramat para iti panangisubli iti nasayaat a kasasaad dagiti public facilities a nadadael gapu kadagiti naglabas a bagyo ken epekto iti napaut a panagtutudo kadagiti napalpalabas a bulan.
Maipalagip nga agarup dua a bulan a naapektaran ti Baguio City iti agtultuloy ken napigsa a panagtutudo gapu iti epekto ti Habagat ken bagyo.
Gapu iti daytoy, adu kadagiti lugar ken imprastraktura iti siudad ti naaddaan iti pannakadadael, sumagmamano a lugar ti nakapasar iti panaglayus, panagreggaay ti daga ken dadduma pay a kalamidad gapu iti napaut a panagtutudo.
Babaen iti daytoy a pondo, maaddaan iti nasayaat a suporta ti lokal a gobierno tapno maipatungpal dagiti kasapulan a proyekto ti rehabilitasion, nangruna kadagiti lugar a naapektaran iti bagyo a Luis, Maymay ken Neneng.
Iti surat ni President Marcos Jr. a naipatulod kenni Mayor Magalong idi November 5, naipasigurado ti pannakaipaay ti nasao a tulong iti Baguio City.
Sakbay daytoy, idi October 9, nagipatulod met ni Acting Executive Secretary Ralph Recto iti surat iti Department of Budget and Management (DBM) a mangkiddaw iti napartak a pannakaiparuar ti Special Allotment Release Order (SARO) para iti nasao a pondo.
Mabalin a maaramat daytoy a tulong kadagiti programa ken proyekto a mangpabaro kadagiti pasilidad ken imprastraktura a nadadael gapu kadagiti kalamidad.
Kabayatanna, naituding a maisayangkat ita a bulan ti Nobiembre ti pormal a seremonya para iti pannakaipaay ti ₱10-million a tulong.
Mangisayangkat met ti lokal a gobierno iti briefing para kadagiti opisial tapno maipakaammo dagiti detalye ken pagannurotan iti umno a pannakaaramat ti pondo.
Manamnama a babaen iti nasao a tulong, mapapartak ti rehabilitasyon ken mapasayaat manen dagiti lugar a naapektaran iti kalamidad.
Saan laeng a panagibangon manen kadagiti nadadael nga imprastraktura ti panggep daytoy a pondo, no di ket tapno maisubli ti nasayaat ken natalged a pannakaaramat dagiti pasilidad a napateg iti panagserbi ti lokal a gobierno kadagiti residente.
Mainaig iti dayta, pinagyamanan ti lokal gobierno ti National Government iti pannakairaman ti Baguio City iti listaan dagiti makaala iti tulong pinansiyal.//Bombo Khey Reparip
