Kinarit ni Senator-judge Robin Padilla ti prosekusyon nga imbestigaranda metlaeng ti klase ti panagbiyag dagiti mammanday-linteg idiay Kamara, partikular dagiti mapapati nga addaan iti nangingina a luglugan nga aggatad iti P16 Million agingga P22 Million.
Impeksa daytoy ni Padilla kalpasan a dinakamat ti prosekusyon ti panangngatang ni Atty. Manases “Mans” Carpio, nga asawa ni Vice President Sara Duterte kadagiti sapatos nga aggatad iti P256,882 idiay Malaysia para kadagiti atleta.
Kinuwestionaran ni Padilla nu apay a daytoy ti nagbalin a pokus ti panagdengngeg iti baet nga adda met dagiti mammanday-linteg nga agar-aramat kadagiti lugan nga aggatad iti minilmilyon a piso.
Impeksa ti senador a rumbeng nga agbalin a patas ti panagtingiting iti panagbiyag ken panaggastos dagiti opisyal ti gobyerno, anyaman ti posisyon dagitoy.
