Namnamaen ni Baguio City Mayor Benjamin Magalong nga itultuloy ti baro a secretary ti Department of Public Works and Highways (DPWH) a ni Atty. Jovanie “Banoy” Lopez dagiti nasayaat a panagbalbaliw a nangrugi iti panangidaulo ni sigud a Secretary Vince Dizon.
Pinadayawan ni Mayor Magalong ti dakkel a panagbaliw iti panagtaripato ken panangimanehar ti nasao nga ahensya, nangruna iti nasaysayaat a panagkakadua ken koordinasyon kadagiti lokal a gobierno.
Sigun iti Mayor, nagbalin a nasaysayaat ti komunikasyon ti DPWH kadagiti Local Government Units (LGUs), a makatulong iti nasaysayaat a pannakaipatpatungpal dagiti proyekto.
Nangruna pay a pinasayaat ti panangipakaammo ti ahensya maipanggep kadagiti nakalinya a proyekto ken dagiti pondo a naipaay kadagitoy.
Daytoy ket mangted iti nasaysayaat a pannakaammo kadagiti lokal a gobierno tapno maimatangan ken maipatalged ti pannakaipatungpal dagiti proyekto iti tunggal lugar.
Namnamaen ni Magalong nga agtultuloy daytoy a nalawag ken nasayaat a sistema uray nagbaliwen ti panangidaulo ti ahensya.
Iti panagbalbaliw ti panangimanehar ti DPWH, namnamaen ti alkalde nga agtultuloy ti panagserbi ti ahensya a nasaysayaat ti koordinasyon, responsable ken panagbalin a nalawag kadagiti proyekto ken pondo ti gobierno.//Bombo Khey Reparip











