Naarestar dagiti dua nga indibidwal kalpasan a nakumpiskar kadakuada ti agarup 1,170 board feet a kayo nga aggatad iti P81,270 babaen iti pinagtitinnulong ti pulisya ken Department of Environment and Natural Resources (DENR) kontra iti ilegal logging sadiay Sitio Naganacan, Barangay Upper Atok, Flora, Apayao.
Nangrugi ti operasyon kalpasan a nangngeg dagiti kameng ti DENR ti uni ti chainsaw manipud iti kabambantayan iti nasao a lugar.
Dagus a nagturong iti lugar dagiti kameng ti Enforcement and Monitoring Section ti Community Environment and Natural Resources Office (CENRO)-Calanasan ket nasabatda dagiti dua a lallaki nga agtawen iti 36 ken 30.
Dagus a timmulong dagiti operatiba ti pulisya iti panangaresto kadagiti suspek ken pannakakumpiskar ti inaramatda a chainsaw nga awanan iti rehistro.
Sigun iti inspeksion ti CENRO-Calanasan, dumanon iti 444 board feet ti baro a naputed a kayo nga addaan iti gatad a P31,080.
Kabayatanna, nagrespondir dagiti kameng ti Flora Municipal Police Station ken 1st Apayao Provincial Mobile Force Company tapno tumulong iti seguridad ti lugar ken panangiturong dagiti naaresto ken nakumpiskar a kayo ken kagamitan iti istasion ti pulisya para iti umno a dokumentasion.
Iti naipatungpal a follow-up operation dagiti Flora MPS, 1st Apayao PMFC, 1505th Maneuver Company ti Regional Mobile Force Battalion 15 ken CENRO-Calanasan, nasarakanda met ti maysa nga inabandona a pagidulinan ti 50 a pidaso ti naputed a kayo nga addaan iti nagduduma a kadakkel ken kaatiddog.
Naibilang a dumanon iti 726 board feet ti pakabuklan a volume dagitoy a kayo nga addaan iti naipagarup a gatad a P50,190.
Dagiti nakumpiskar a kayo iti kabakiran ket naiturong iti opisina ti CENRO-Calanasan idiay Barangay San Gregorio, Luna, Apayao para iti kustodiya ken umno a disposision.
Sumango dagiti dua a naarestar iti naipila a reklamo gapu iti panaglabsing dagitoy iti Presidential Decree 705 wenno Revised Forestry Code of the Philippines ken Presidential Decree 9175 wenno Chain Saw Act of 2002.
Impalagip ti Police Regional Office Cordillera Administrative Region nga agtultuloy ti panangpapigsa da iti panagtitinnulong kadagiti ahensia a mangaywan iti aglawlaw tapno mapukaw ti ilegal logging ken maprotektaran dagiti kabakiran iti rehion.//Bombo Khey Reparip











