Inaprubaranen ti House of Representatives ti gakat a mangipalubos iti panakaaramat ti medical cannabis bayat ti pinal a panakaibasa daytoy iti plenary session idi kalman, Hulyo 30.
Dumanon iti 177 a lawmakers ti immanamong, siam(9) ti saan, bayat a siam(9) met ti nag-abstain wenno saan a nagbotos para iti panagbalin a linteg ti House Bill No. 10439 wenno ti Access to Medical Cannabis Act.
Babaen iti nasao a gakat, mapalubusan laeng ti panakaaramat ti marijuana para iti medikal a pagkasapulan dagiti kwalipikado a pasyente nu sadino, naiyunay-unay nga agtalinaed daytoy nga iligal nu para iti recreational use.
Malaksid iti dayta, maakses laeng ti medical cannabis babaen iti preskripsyon dagiti accredited a doktor.
Mainaig iti dayta, mapangpanggep metlaeng ti panakaaramid ti Medical Cannabis Office nga agserbi kas regulatory body iti sidong ti Department of Health(DOH) a mangmonitor metlaeng iti panakaiyimplimintar ti nasao a gakat.
Kabayatanna, manamnama met ti kooperasyon ti regulatory body iti Dangerous Drug Board tapno masigurado ti panagtulnog iti security requiremnents tapno maliklikan ti nonmedical wenno recreational a panagaramat iti marijunana.
