BAGUIO CITY- Insumiteren ti Philippine Drug Enforcement Agency (PDEA)-Cordillera ti accomplishment report dagitoy manipud 2016 agingga Hunyo 30, 2022 kenni incoming president Ferdinand Bongbong Marcos Jr.
Iti interview ti Bombo Radyo Baguio, kinuna ni PDEA-Cordillera Regional Director Gil Castro, ditoy a mapaneknekan ti napintas a kampanya ti rehiyon kontra iti iligal a droga.
Dinakamatna a minilmilyon ti gatad dagiti marijuana ken droga a nakumpiskar ken dinadael dagitoy.
Inayonna nga ado metlaeng a drug personalities ti nakemmeg nu sadino karaman ditoy dagiti sigud nga opisyal iti gobyerno, retirado a personnel ti pulisya, negosyante ken daduma pay.
Naduktalan a kangrunaan nga ar-aramaten dagiti suspek iti rehiyon ket ti iligal a droga bayat a ti marijuana plants ket maiturturong kadagiti daduma a rehiyon iti pagilian.
Binigbig met ni Castro dagiti kangrunaan a rason iti panagaramat ken panagilako dagiti suspek iti marijuana ken shabu kas ti kinarigat ti biag, depression, problema ti pamilya, parikut iti sexual activity ken daduma pay.
Nupay kasta, impeksana a nakasagana ti PDEA-Cordillera a mangtulong kadagitoy babaen iti pannakiumanda kadagiti nagduduma nga ahensiya ti gobyerno para iti pannakaipaay ti alternibo a pammastrekkan ken pagbiagan.
Kabayatanna, impannakel met ni Castro ti panagbalin ti Cordillera kas safest region iti entero a pagilian idi 2021.
Imbinglayna a sipud nagtugaw daytoy kas dadaulo ti PDEA-Cordillera ket awan ti aniaman a kaso a naipila kontra kadagiti personnel partikular ti human rights violation.
Impettengna nga amin nga operasyon ti ahensia kas ti buy-bust operation ket agar-aramatda ti body worn camera.
Impaganetget met ni Castro a saan a rumbeng nga agpakampante ken agragsak dagiti drug personalities iti asidegen a panagleppas ti termino ni President Rodrigo Duterte.
Inyunay-unayna a nupay agsukaten ti liderato ket saan latta a mabaliwan ti performance ti PDEA-Cordillera nu di ket ad-adda pay nga ingetanda ti operasyon kontra iti iligal a droga ken kadagiti drug personalities.
Kidkiddawen met ti ahensiya iti sumaruno nga administrasyon nga ituloyna dagiti napintas a rinugian ni outgoing President Rodrigo Duterte.
