BAGUIO CITY – Apektado ita ti adu nga overseas Filipino workers (OFWs) iti krisis a mapaspasaran sadiay Lebanon.
Iti eksklusibo nga interbyu ti Bombo Radyo-Baguio ken ni Teresa Rufino, maysa nga OFW sadiay Beirut, Lebanon, kinunana nga agtultuloy ti mapaspasaran sadiay a krisis iti politika ken ekonomia.
Dinakamatna nga adu dagiti am-ammona nga OFWs nga apektado gapu iti panagrikep dagiti kompania bayat a dagiti dadduma nga employer ket awanen ti ipasueldoda kadagiti empleadoda.
Kinunana nga agparparikot ita ti dadduma nga OFWs gapu iti nababa unay a balor ti Lebanese Lira kontra iti US dollar.
Dinakamat ni Rufino nga adun kadagiti OFWs sadiay Lebanon ti kayatda ti agawid bayat a ti dadduma nga employer ket boluntario a pagaw-awidenda dagiti empleado a Pinoy.
Innayonna nga agtultuloy ti voluntary repatriation a maipatpatungpal kadagiti OFWs sadiay Lebanon ken agpatingga inton Pebrero 15 ti panagpalista dagiti interasao nga agawid ditoy pagilian.
