Dua nga indibidwal ti nakemmeg iti impatungpal a buy-bust operation dagiti otoridad idiay Burnham Park, Baguio City idi laeng October 26, 2024.
Dagiti dua nga akusado ket agama a residente iti Kayapa, Bakun, Benguet.
Ti ama ket agtawen iti 50 bayat nga agtawen met iti 15 ti anak daytoy a lalaki.
Nakumpiskar manipod kadakuada ti dua a pidaso iti maatap nga high grade marijuana wenno Kush a nakabungon iti black plastic sachet ken tape nnu sadino, agdagsen daytoy iti dua a kilo ken addaan iti Standard Drug Price a Php3Million.
Malaksid iti drug evidence, nakumpiskar metlaeng dagiti daduma pay a non-drug evidence kas iti maysa a piraso iti genuine 500 peso bill a nakaparabaw iti 119 a piraso iti peke a five hundred peso bill, dua a cellular phone, aggatad iti Php250 a kwarta, ken maysa a nangisit a back pack.
Iti panangala ti Bombo Radyo iti pammalawag ti akusado, kinunana a naibaon laeng dagitoy a mangiyawat iti nasao a bag iti gumatang iti nilaon daytoy ken saanda a ninamnama a marijuana gayam ti adda iti uneg iti nasao a bag.
Innayon ti singkwenta anyos nga akusado a naaramidda laeng ti nasao a banag gapu ta kasapulanda iti pamastrekan kalpasan a nagsardeng dagitoy iti trabahoda iti construction gapu iti panagsakit.
Nupay kasta, sumango latta dagitoy iti kaso a panaglabsing iti Section 21 iti RA 9165 wenno ti Comprehensive Dangerous Drugs Act of 2002″.
Iti agdama, naiturungen ti singkwenta anyos nga akusado ken dagiti ebidensya a nakumpiskar iti kustodiya iti Philippine National Police-Drug Enforcement Grou- Special Operations Unit-Cordillera, bayat a naipaima met iti City Social Welfare and Development Office-Baguio ti menor de edad nga anak daytoy.
Ti naballigi nga operasyon ket naipatungpal babaen iti nagtitipon a pwersa iti PNP Drug Enforcement Group-Special Operations Unit-Cordillera,kadua ti Philippine Drug Enforcement Agency-Baguio, Benguet Police Office, Station 7.//Bombo Jez Lapizar
