Agarup sangagasut nga estudiante manipod iti University of the Philippines (UP) Baguio ti nag-walkout manipod iti klaseda tapno mangisayangkat iti tignay-protesta kontra iti giera iti Estados Unidos ken Israel kontra iti Iran, kasta metten ti ipupusay iti maysa nga estudiante iti UP a karaman iti sangapulo ket siam a pimmusay iti maysa nga operasion iti militar idiay Negros Occidental.
Nagsindi ti kandila dagiti estudiante para kenni Alyssa Alano, maysa a kameng iti student council iti UP Diliman, a pimmusay idi Abril 19 iti maysa nga engkwentro iti nagbaetan iti militar ken iti New People’s Army idiay Toboso.
Kaduana metlaeng iti napapatay iti nasao nga insidente ti journalist a ni RJ Nicholle Ledesma.
Sigun kagiti report, ni Alano ket karaman iti sangapulo ket siam a pimmusay iti engkwentro iti nagbaetan iti militar ken dagiti mapapati a rebelde, numan pay adda ti saan nga agpapada a bersion seknan iti pudno a napasamak.
Sakbay a nagurnong, nirukus paylaeng dagiti estudiante, a kaaduan kadakuada ket kameng iti League of Filipino Students (LFS), ti nagduduma a silid-pagadalan.
Nagurnong dagitoy iti maysa a parking lot iti kampus ken nagmartsa pababa iti Session Road tapno makikaykaysa iti event iti Baguio market kas pananglagip iti Cordillera Day.
Sigun kenni Sebastian Sabban, dadaulo iti LFS iti UP Baguio, saanen a baro ti “agression” iti US ken nabayagen a puntiriada ti babassit a pagilian a mangikalkalintegan ti soberaniada.
Kabayatanna, kidkiddawen pay ti maysa nga estudiante iti management iti UP a mangipaay iti tulong-pinansial kadagiti estudiante a naapektaran ti pamilia gapu iti panagngato iti presio iti lana.
