Namnamaen ti Philippine Coast Guard (PCG) a saan a bumaba iti 3 million a pasahero ti sumangbay kadagiti sangladan iti nadumaduma a paset ti pagilian para iti panagrugi ti Semana Santa.
Sigun kenni PCG Spokesperson Commodore Noemi Cayabyab, dumanon iti agarup 390,000 nga inbound ken outbound passengers iti amin a sangladan iti pagilian ti nailista dagitoy, maibasar iti kaudian a datos ti nasao nga ahensia.
Mainaig iti dayta, manamnama nga ad-adda a sumangbay ti ad-adu pay a pasahero intun Huwebes ken Biyernes Santo a naidekla kas regular holidays.
Kabayatanna, naiwaras itan kadagiti nagduduma a sangladan iti pagilian dagiti agarup 17,000 a kameng ti PCG tapno mangipaay iti seguridad dagiti pasahero, mangisayangkat iti security patrols ken mangipaay iti assistance iti search and rescue mission no kasapulan.
