BAGUIO CITY – Nakemmeg ti lima a drug couries gapu iti panangibiaheda iti marijuana nga aggatad ti agarup P3.9-M iti nagsisina nga operasyon a naisayangkat sadiay Mountain Province.
Nakemmeg ti free-lancer video editor a ni Eliterio Celada Pazon, 25-anyos ken residente ti Sta. Rita, Guiguinto, Bulacan iti naisayangkat a checkpoint operation sadiay Nacagang, Tambingan, Sabangan, Mt. Province idi malem ti Dominggo, August 18.
Nakalugan daytoy iti parapasahero a lugan paturong iti Abatan, Bauko, Mt. Province ken nakumpiskar kenkuana ti 10 a marijuana bricks a naikabil iti bagna nga aggatad amin iti agarup P1.2-M.
Nakemmeg metlaeng ti dua a menor de edad nga agpada a 17-anyos a residente ti Sampaloc Street, Doña Nicosia Subdivision, Commonwealth, Quezon City kalpasan a na-checkpoint ti naglugananda a bus saiday Paleng, Lagan, Sabangan, Mt. Province idi agsapa ti napalabas a Huwebes, August 15.
Nakumpiskar kadakuada ti uppat a marijuana bricks nga aggatad ti P480-K.
Nakemmeg pay dagiti dua nga indibidual iti bus terminal sadiay Poblacion, Bontoc, Mt. Province idi agsapa ti napalabas a Huwebes, August 15 kalpasan a nakumpiskar kadakuada ti 12.95 kilos ti marijuana nga aggatad ti P1.5-M.
Nabigbig dagitoy a da Jay Farala, 22-anyos ken Joshua Brylle Dela Paz, 23-anyos, agpada a residente ti Cruz Street, Parang, Marikina City.
Narekober met ti uppat a marijuana bricks ken dua a tubular marijuana leaves a naikabil iti sako nga aggatad ti P720-K iti deppaar ti Bontoc-Kalinga Road partikular sadiay Cheka-a, Bontoc Ili, Bontoc, Mt. Province idi agsapa ti Biyernes, August 16.
Naamuan nga imbati dagitoy dagiti saan pay a nabigbig nga indibidual a posible a nabutngan iti nairtengan a kampanya ti gobyerno kontra iti iligal a droga babaen iti checkpoint ken interdiction operations.
Sumangsango ita dagiti nakemmeg nga indibidual iti kaso a panaglabsing iti RA 9165 wenno ti Comprehensive Dangerous Drugs Act of 2002 bayat a dagiti menor de edad ket naipaima iti Municipal Social Welfare and Development Office.
Sigun iti Cordillera PNP, naobserbaranda ti panagngato ti bilang dagiti agtutubo manipud NCR nga agbalbalin a drug couriers nga agpampammarang kas turista nga apan gumatang ti iligal a droga, partikular ti marijuana ditoy rehiyon.
Gapu iti daytoy, ibalbalakad ti pulisya ti panangbantay dagiti nagannak kadagiti annakda nangruna dagiti agtutubo gaputa nalaka a maallukoy dagitoy dagiti sindikato a mangididiaya ti dakkel a gatad kasukat ti panagbalin dagitoy a drug couriers.
