BAGUIO CITY – Agkasapulan ti Department of Labor and Employment (DOLE) – Cordillera iti agarup P300-M tapnu maipaayan iti tulong dagiti trabahador iti rehion a napukawan ti panggedan gapu iti epekto ti COVID-19 pandemic iti trabaho dagitoy.
Sigun kenni DOLE – Cordillera regional director Exequiel Ronie Guzman, dumanon iti agarup 50,000 a trabahador iti rehion ti saan pay a naipaayan ti tulong iti sidong ti COVID Adjustment Measure Program (CAMP) ti ahensia.
Kinunana nga adda met ti P125-M a naiwaras iti nasurok 25,000 a trabahador iti rehion a nagnumar iti nasao a programa.
Inaklonna a saan pay a karaman kadagiti saan a naipaayan tulong dagiti trabahador a saan pay a nagaplikar para iti CAMP.
Gapu iti daytoy, namnamaenda a maimplementar ti maikadua a dupag ti nasao a programa mangrugi ita a bulan agingga inton Disyembre.
Maibasar iti datus ti DOLE-Cordillera, nasurok 75,000 a trabahador ditoy rehion ti napukawan wenno naapektaran ti panggedanda gapu iti nagduduma a rason kas iti temporaryo ken permanente a panagrikep ti pagtatrabahuanda, panagkissay ti trabahador wenno iti aldaw ti panagtrabaho dagiti trabahador ken dadduma pay kita ti working arrangement.
