Agtultuloy ti panagmonitor dagiti otoridad para iti panaka-eradicate dagiti marijuana nu sadino nadiskobre ti agarup P72.5 million a gatad ti marijuana sadiay Saclit, Sadanga, Mountain Province itay nabiit.
Iti panakiuman ti Bombo Radyo kenni Police Lieutenant Peter Apangcay, ti Deputy Police community affairs and development unit ken Public information officer ti Mt. Province Provincial Police Office, kinunana a dagiti marijuana ket mismo a dagitoy ti agtubtubo nangruna nu immunan a naimula daytoy iti maysa a lugar kasta met a dakkel a factor ti panawen ti panagtutudo para iti panagtubo dagitoy.
Sigun kenni Apangcay, nadiskobre ti lima gasut a kilos ti dried marijuana ken leaves iti maysa a kubo kasta met ti plantasyon a nakaimulaan ti agarup 62,500 a pidaso ti fully grown marijuana plants iti Mt. Chalimuno.
Nu pay kasta, awan ti natiliw a cultivator iti nasao nga operasyon bayat a dagus a pinooran dagitoy dagiti otoridad.
Kabayatanna, nagpalagip ni Apangcay a saan dagitoy nga agsardeng nga agmonitor ken mangkita iti aglawlaw ti Mt. Province tapno maipasigurado a dagiti mula a marijuana ket dagus a maeradicate kasta met nga impeksana a saan dagitoy nga agsardeng a mangipatungpal iti marijuana eradication gapu ta daytoy ket mangdadael iti masakbayan dagiti ubbing.
