BAGUIO CITY – Dinadael dagiti otoridad ti agarup P8.65-M a gatad dagiti pinuon ti marijuana iti tallo nga aldaw nga eradication operation dagitoy sadiay Barangay Ngibat, Tinglayan, Kalinga manipud Abril 12 agingga idi kalman, Abril 14.
Resulta daytoy ti insayangkatda nga Oplan Butterfly a nakadiskobre-an dagiti iligal a mula a matartaripato iti uppat a pagmulaan nga addaan kalawa a 4,300 square meters.
Dumanon met iti 43,000 a pinuon ti marijuana nga aggatad ti P8.6-M ti pinarut ken inuram dagiti otoridad manipud kadagiti nasao a disso.
Nadiskobre pay dagiti otoridad ti 400 grams a napagango a bulbulong ti marijuana nga aggatad ti P48-K manipud iti umuna a plantation site.
Nupay kasta, awan ti natiliw a marijuana cultivator kabayatan ti operasyon.
Inkari met ti Kalinga Police Provincial Office nga ituloy ti tropa ti gobyero ti kampanya kontra iti iligal a droga iti tulong dagiti opisyales dagiti barangay ken munisipyo ken dagiti umili tapnu madalusan amin a barangay sadiay manipud iti iligal a droga.
