BIHAR STATE, INDIA – Nalmes ti agarup uppat a pulo ket innem nga indibidual, pakairamanan ti tallo pulo ket pito nga ubbing bayat ti silibrasion ti Hindu Festival sadiay eastern India.
Nalmes dagiti uppat a pulo ket innem nga indibidual iti Bihar State bayat ti ritual a panagdigus dagitoy iti maysa a karayan ken danum a naurnong iti napalabas a panaglayus, sigun kadagiti opisial ti Bihar Disaster Management Department (DMN).
Sigun iti masya nga opisial iti nasao a lugar, saan nga inkankano dagiti tattao ti napeggad a lebel ti danum kadagiti karayan kasta met kadagiti danaw bayat ti panagdigusda tapno selebraranda ti nasao a piesta.
Napasamak ti insidente idi Martes, September 24 ken Mierkules, September 25 iti agdama a tawen kadagiti sangapulo ket lima a distrito ti Bihar bayat iti Jitiya Parv Festival a rambakan dagiti nagannak para iti pagimbagan dagiti annakda.
Iti agdama, manarimaan ti panangbiruk dagiti maseknan nga otoridad iti tallo pay nga indibidual a mapukpukaw.
