Pinukpuk, Kalinga– Pimmusay ti agassawa a “senior citizens” gapu iti panagbagbagsol ti kaarubada agingga a matay dagitoy iti uneg iti pagtaengan idiay Pinukpuk, Kalinga idi laeng kalman ti rabii, Mayo 16.
Nabigbig dagiti biktima a da Ruben Dangiwan, 65-anyos, ken Apolonia Dangiwan, 63-anyos, agpada a residente iti Sitio Magtanga, Brgy. Wagud Pinukpuk, Kalinga.
Sigun kenni PCapt. Ruff Manganip, ti suspek ket nabigbig nga agtawen iti 24 a lalaki a kaaruba dagiti biktima ken nakemmeg daytoy kalpasan iti “hot pursuit operation” nga insayangkat dagiti kameng iti Pinukpuk Municipal Police Station (MPS).
Inlawlawag ni Manganip a ti panagbagbagsol ket napasamak iti alas 9:30 ti rabii iti nasao a petsa iti pagtaengan dagiti biktima.
Dagos a nagresponde dagiti pulis iti nakapasamakan iti insidente ken nabigbig ti kaarubada kas kangrunaan a suspek nu sadinno, inaklon iti ama iti suspek a ti anakna ti karaman iti krimen.
Iti panagtutuloy iti imbestigasion, naamuan a ti “brutal” a panagbagbagsol ket nagtaud manipod iti panag-inum iti nagbaetan ti suspek ken ti lalaki a biktima iti nasapsapa a paset iti nasao nga aldaw, nu sadinno, kimmaro ti tension gapu iti mapapati a panagsao ti biktima iti maipapan iti “infidelity”, a rason iti suspek tapno patayen ti biktima iti panagsublida iti pagtaenganda.
Dagiti biktima ket nagsagrap iti “multiple stab wounds” iti ulo dagitoy ken iti ngato iti “torso” daytoy.
Iti agdama, imet ita iti kostodiya iti Pinukpuk MPS ti suspek ken maipasidong daytoy iti “inquest proceedings.”
Gapu iti nasapamak, nagballaag dagiti otoridad nga agannad ken agingga laeng a kalkalaingan (“moderation”) nu uminom iti arak, gaputa patien dagiti otoridad a ti nalabes a panaginum iti arak ket mangitunda iti kinaranggas.
