BAGUIO CITY – Mangipatungpal ti Baguio City Health Office iti kanayonan a serye ti Aggressive Community Testing kadagiti susceptible sectors inton Hunyo 11-12 sadiay Melvin Jones Grandstand mangrugi iti 8:00am agingga 5:00pm.
Naiskidyul inton hunyo 11 ti swab testing dagiti 200 empleyado ti gobyerno, 100 nga empleyado ti hotel ken 200 a food handlers.
Naituding met inton hunyo 12 dagiti 200 a construction workers, 200 nga empleyado dagiti wellness centers, 200 nga miyembro ti ministry, 100 nga empleyado ti business process outsourcing wenno customer service relations.
Kinuna met ni City Health Officer Dr. Rowena Galpo a nupay nangato ti testing rate ti siudad ngem inlawlawagna a nababa ti testing requirement rason nga agtultuloy ti panangipatungpalda iti community testing.
Iti kaudian a datus, 118,871 ti pakabuklan a bilang dagiti indibidual a naipasidong iti COVID-19 testing katukad ti 31.74% a populasyon ti Baguio City.
Kabayatana,
Narugianen ti pangipaay ti Baguio City Health Services Office (CHSO) iti bakuna a Gamaleya Sputnik V kadagiti umili ti siudad.
Sigun kenni Cecille Agpawa, dadaulo ti Risk Communication ti CHSO, nangrugi ti vaccine roll-out sadiay SLU gym idi kalman ken naituloy ita nga aldaw.
Nupay kasta, dinakamatna a 300 laeng nga indibidual ti makaawat iti umuna a dose ti nasao a bakuna gaputa limitado ti suplay daytoy.
Kinunana a tallo laeng a lawas ti palabsen dagiti immunan a nakaawat iti umuna a dose sakbay a maawatda manen ti maika-dua a dose ti nasao a bakuna.
