BAGUIO CITY – Imbilin ti dadaulo ti Police Regional Office Cordillera (PROCOR) ti aktibo a panaka-aramat ita dagiti K-9 units ti pulisya kabayatan dagiti checkpoint operations.
Sigun kenni PROCOR Regional Director, PBGen. Ronald Lee, makatulong ti nasao nga addang iti panakalapped ti transportasyon ti iligal a droga ditoy rehion Cordillera.
Dinakamatna ti pagkasapulan para iti nairtengan a panakaisayangkat dagiti checkpoint operations a paka-aramatan dagiti narcotic detection dogs tapnu maduktalan ti presensia dagiti iligal a droga.
Inyunay-unayna a no adda ti iligal a droga a nagtaud ditoy Cordillera ken matiliw iti ruar ti rehion ket agpalawag dagiti dadaulo ti pulisya iti maseknan a probinsia ken munisipyo iti rehion ken iti maikatlo a gundaway a mapasamak ti insidente ket maikkat dagiti maseknan nga opisyales ti pulisya iti lugar a nagtaudan ti iligal a droga.
Impettengna pay a babaen iti kaadda dagiti narcotic detection dogs iti tunggal exit point iti rehion ket marigatan dagiti drug smugglers a makalsot kadagiti checkpoints a sumrek ken rumwar iti Cordillera.
Maibasar met iti rekord ti Kalinga Police Provincial Office manipud April 5 agingga ita a bulan, nakaisayangkatda iti pito nga anti-illegal drug operations iti tulong dagiti dadduma a law enforcement agencies a nagresulta iti panakatiliw ti pito a drug personalities ken panakakumpiskar ti nasurok 1.3 grams ti shabu ken nasurok 433,000 grams ti marijuana nga aggatad amin ti nasurok P51.97-M.
