Impakaammo ti Philippine National Police a mapusasan ni dismissed Bamban, Tarlac Mayor Alice Guo ken agsuot ti bulletproof vest nu dumar-ay daytoy iti Senate hearing para iti imbestigasyon ti illegal Philippine Offshore Gaming Operators (POGOs) inton bigat.
Sigun kenni PNP Spokesperson Police Colonel Jean Fajardo, iskortan dagiti pulis ni Guo nga umikkat iti PNP Custodial Center idiay Camp Crame, Quezon City inton bigat, alas otso ti agsapa ken agturong dagitoy iti opisina ti Senado idiay Pasay City para iti Senate hearing a maangay, alas dies ti agsapa.
Impasigurado met ni PCol. Fajardo a nainget a maipatungpal ti security protocols iti pannakaiyakar ni Guo iti kustodiya ti senado.
Immunan a nangipaulog ti korte idiay Tarlac iti arrest order kontra kenni Guo ken imbilinna ti panagdar-ay daytoy iti Senate hearing.
Iti agdama ket agtaltalinaed ni Guo iti detention room a naikabilan metlaeng ni sigud a senator Leila de Lima.
Ti nasao a kwarto ket ordinary quarters, awanan iti air condition unit, single bed nga addaan iti metal frame, bassit a lamisaan, monoblock chairs, ken toilet.
Kabayatanna, inkari ni Fajardo a saan a mapasanak kenni Guo ti insidente ti hostage taking a napasamak kenni de Lima idi Oktobre 2022 bayat ti kaaddana iti Custodial Center.
