Naduktalan a sumagmamano kadagiti mapapati a miembro ti private army ni Kingdom of Jesus Christ Pastor Apollo Quiboloy wenno angels of death ket addaan iti paltog maibasar iti rekord ti Firearms and Explosives Office of the Philippine National Police (FEO-PNP).
Sumagmamano kadagitoy ti addaan iti lisensia bayat a dadduma kadagitoy ket awanan iti rekord iti Firearms and Explosives Office, sigun kenni Philippine National Police Civil Security Group (CSG) spokesman Lt. Col. Eudisan Gultiano.
Sigun iti Philippine National Police, imet dagitoyen ti nagan dagiti mapapati a kameng ti nasao a grupo ngem saanda pay a naammuan no ania a klase ti paltog ti kukuada dagitoy.
Malaksid iti dayta, adda ti imbestigasion a karaman dagiti nasao nga “Angels of Death” kadagiti panangaramid iti krimen.
Kabayatanna, inlibak manen ti kampo ni Quiboloy ti kaadda dagiti angels of death iti Kingdom of Jesus Christ.
Maipalagip nga immuna a kinuna dagiti kameng ti pulisia a dagiti sumagmamano a maipagarup a sex slaves ni Quiboloy, a menor de edad ket napangtaanda kadagiti “angels of death” no ibagada iti asinoman ti maipapan iti seksual a panangabuso iti compound ti Kingdom of Jesus Christ.
