Agtultuloy nga ipatpatungpal ti Public Order and Safety Division ti anti-peddling ordinance wenno ti panangmonitor kadagiti ambulant vendors iti siudad ti Baguio.
Iti panakiuman ti Bombo Radyo kenni Daryll Kim Longid, dadaulo ti Public Order and Safety Division, nabayagen a parikut ti siudad dagiti ambulant vendors nupay kasta iti laksid a matiltiliwan dagitoy ket saanda a maum-uma nga agsubli nga agilako.
Sigun kenni Longid, dagiti ambulant vendors ket manipud kadagiti nagduduma a paset iti pagilian ngem gapu iti panagnaedda iti siudad ket nagbalin dagitoy a residente.
Kinunana a mabigbigbig dagiti ambulant vendors kas “long term peddlers” nu sadino kaykayatda nga iligal nga agilako tapno maliklikanda ti panagbayad ti buis wenno aniaman a mabayadan iti gobyerno ti siudad.
Innayon a maysa kadagiti estratehiya dagitoy ket ti panagaramat ti dakkel a bag para iti produkto-da bayat a daduma kadagitoy ket agar-aramat ti bodega tapno ilemmeng dagiti ilako-da a produkto.
Kabayatanna, kinuna ni Longid a dagiti makumkumpiskar a produkto manipud kadagiti kadagitoy ket dagus a maipaima iti maseknan nga ahensiya bayat a dagiti daduma ket maiturturong iti Department of Social Welfare and Development.//Bombo Mera Pacpacan
