BAGUIO CITY – Boluntaryo a simmuko kadagiti otoridad ti armado a lider dagiti rebelde a New People’s Army (NPA) ken ti kadwana a full-time Militia ng Bayan sadiay Mountain Province.
Simmuko ni alyas Jet, 40-anyos ken vice-squad leader ti Squad 1, Kilusang Larangan Guerilla Marco kadagiti pulis ken soldado sadiay Patay, Poblacion, Sagada, Mt Province ken insukona pay ti maysa nga M16 assault rifle nga addaan maysa a magazine a naglaon ti 13 a bala.
Simmuko met ni alyas Tubay, 47-anyos a full-time Militia ng Bayan iti sidong ti Kilusang Larangan Gerilya Marco kadagiti pulis ken soldado sadiay Belwang, Sadanga, Mt Province ken insukona pay ti maysa nga M16 assault rifle nga addaan ti maysa a magazine.
Inaklon dagiti dua a maysa kadagiti biddut a desisyonda ti panagsuportar ken panakinayonda iti rebelde a grupo a rason iti panagbalin a miserable ti biagda.
Sigun kenni Brigadier General Henry Doyaoen, commander ti 503rd Brigade ti Philippine Army, ti agtultuloy a panagsuko dagiti rebelde ken dagiti mangsupsuportar iti nasao a grupo ti mangipakpakita iti natibker a kolaborasyon dagiti tropa ti gobyerno kadagiti stakeholders nga agbungbunga iti epektibo a kampanya tapnu maispal dagiti kailyan a naallilaw dagiti rebelde a grupo.
