Pinagyamanan ti maysa a Cordilleran football player ti Philippine Football Federation wenno PFF gapu iti talek a naited kenkuana tapno mairaman iti men’s national football team Azkals.
Iti maysa nga exclusive interview ti Bombo Radyo kenni Audie Menzi, dinakamat na a naka-awat daytoy iti imbitasyon iti PFF para iti available slots iti Azkals a naituding a makisalip iti Asean Football Federation (AFF) Mitsubishi Electric Cup idi napalabas a bulan ti Disyembre.
Gapu iti daytoy ket impursige pay ti 28 anyos a defender ti dedikasyon na a pasayaaten ti ay-ayam na babaen iti naing-inget pay a training ken ensayo tapno makastrek iti Philippine Team.
Inladawan pay ni Menzi a naisangsangayan ti narikna na idi nainayun daytoy iti final lineup ti Azkals nangnangruna idi nagna ken nagturong iti football pitch usar ti Philippine Team Uniform ken bayat ti panagkanta da iti Lupang Hinirang sakbay iti tunggal ay-ayam.
Imbinglay pay ti atleta ti kapadasan na iti maudi nga ay-ayam ni Philippine Men’s National Team captain Stephan Schrock nu sadino napili pay daytoy iti starting line-up ti Azkals kontra iti Indonesia.
Sigun pay iti player a tubo ti Benguet, saan na malipatan ti nagbalin a balakad ni Schrock kenkuana nga ituloy na nga namnamen ti ragsak ti panagay-ayam babaen iti panagited na iti amin a kabaelan iti amin a football matches.
Ni Menzi ket adda ita idiay Metro Manila tapno agsubli iti training para iti bunggoy na a Kaya Futbol Club-Iloilo nu sadino ket naipaayan daytoy ti rekognasyon manipud kenni Benguet Gov. Melchor Diclas idi Lunes.
Ti multi titled soccer player ket tubo ti La Trinidad, Benguet ken nagay-ayam daytoy iti bunggoy ti Benguet State University idi elemetarya ken nagturong idiay Manila tapno agadal ti highschool agingga college idiay Far Eastern University nu sadino nagbalin a kampeoan dagitoy iti 2015 UAAP. // Jordan Tablac
