Imbalud ti maysa a korte idiay Sweden ti maysa a babai kalpasan a pinagbalinna kas adipen dagiti babbai ken ubbing a Yazidi idiay Raqqa, Syria bayat ti panagturay ti terror group nga ISIS.
Napilaan ti saanen a nainaganan a babai iti reklamo a genocide, crimes against humanity ken gross war crimes.
Innem nga ubbing ken tallo a babbai manipod iti ethnic ken religious Yazidi group ti imbalud ti babai iti mano a bulan idi tawen 2015, sigun iti Stockholm District Court.
Bayat a natengngelda kas adipen, napilitan dagiti biktima a makipaset kadagiti narelihiosuan nga aramid ti Islam, naiparitda a mangtungpal iti bukodda a relihion ken kultura, ken nabilinda nga agaramid kadagiti trabaho iti pagtaengan, sigun paylaeng iti korte.
Dadduma kadagiti biktima ti naatake ken namolestia.
Imbilang gamin ti ISIS ti Raqqa idiay Syria a kabiserada a sinakupda idi tawen 2014.
Dagiti ospital ken pasdek sadiay ket napagbalin a headquarters ken “public executions.”
Pinatay ken pinagbalin nga adipen dagiti ISIS ti ginasgasut a ribu nga Iraqi Yazidis nu sadinno, kinautiboda dagiti babbai ken ubbing ken pinatayda dagiti lallaki.
Ti grupo a biktima ti babai a nasentensiaan idi Martes ket naala a kautibo idi Agosto, tawen 2014, kalpasan a nangraut ti ISIS kadagiti purok dagiti Yazidi iti Northern Iraq’s Sinjar district.
Sigun iti korte, napapatay dagiti lallaki a kabagianda kadagiti panangraut.
