BAGUIO CITY – Impeksa dagiti doktor ditoy Baguio City ti kinasaganada a tumulong kadagiti kakadwada a doktor kadagiti kaaruba a probinsia para iti panakaipasdek ti bukod dagitoy a COVID-19 control and treatment systems tapnu mapasayaat ti kapabilidad ti ospital dagitoy a mangaksion iti health crisis gapu iti agdama a pandemic.
Iti panakitaripnongda kenni Mayor Benjamin Magalong, impeksa dagiti nasao a doktor ti pakaseknanda iti kinakurang ti kinasagana dagiti ospital iti Region 1 ken Region 2 nga agresresulta iti kapilitan a panangipaimada iti COVID-19 patients kadagiti mas organisado a pasilidad ti Baguio kas iti Baguio General Hospital and Medical Center (BGHMC).
Kinunada nga iti kanito a mapasamak ti nasao nga insidente ket masayang dagiti aksion ti siudad tapnu makontrol ti panagwaras ti nasao a virus ditoy lokalidad.
Nagbalin a reaksionda daytoy kalpasan nga impeksa ni Mayor Magalong ti kinasagana ti siudad a mangawat kadagiti COVID patients manipud iti dadduma a lugar nangruna ta dagiti panagsagana ti siudad ket para iti nasao a ranta nangruna ta naituding a madutukan ti BGHMC kas COVID-19 regional treatment center.
Nupay kasta, impetteng dagiti doktor iti siudad a nasken nga adda ti limitasyon tapnu maguyugoy dagiti dadduma a rehion a mangpasayaat iti kapabilidad dagiti ospital dagitoy.
Innayonna a napimpintas laengen no tulonganda dagiti doktor dagiti kabangibang a rehiyon iti panakaipasdek ti bukodda a quarantine ken critical care units nangruna ta dagitoy nga ospital ket addaan ti kapada a kategorya ken lebel iti BGHMC.
Immanamong met ti mayor iti takder dagiti doktor iti siudad ngem inwaragawagna a maituloy latta dagiti panagsagana iti kanito nga adda ti pagkasapulan para iti panangakomodar ti siudad kadagiti pasyente ti COVID nga agtaud iti dadduma a probinsia wenno rehion.
