Binigbig ken pinadayawan ti Philippine Red Cross- Baguio Chapter dagiti blood donors ken partners dagitoy kagiddan ti pannakarambak ti National Blood Donors Month a naangay iti SM Baguio Atrium.
Karaman kadagiti napadayawan ket ti Bombo Radyo Philippines – Baguio a nakaawat iti Hall of Fame award agsipud ta agarup sangapulo ket siyam a tawenen a mangipatpatungpal iti blood- letting activity babaen iti pannakipartnerda iti Philippine Red Cross.
Ti nasao nga award ket inawat da Bombo Cara Sacyaten, Officer-In-Charge ti Bombo Radyo Baguio ken Star DJ Eugenio Abellera, Station Manager ti Star FM.
Nangrugi a nangipatungpal ti Bombo Radyo Philippines iti blood letting activity a napauloan iti Dugong Bombo: A Little Pain A Life To Gain ken nagtultuloy daytoy agingga iti agdama gapu iti ayatda a tumulong kadagiti agkasapulan iti dara.
Pakabuklanen a 1,265,400 cc of blood ti nakolektar ti Bombo Radyo Baguio ken ken Star FM Baguio ken manamnama a manayonan pay daytoy kadagiti sumarsaruno a tawen.
Naituding met a mangipatungpal manen ti Bombo Radyo ken Star FM iti blood letting activity inton Nobyembre 16, 2024 iti Baguio City ken idiay La Trinidad, Benguet tapno ad-ado pay ti matulongan a pasyente.
