Nakaawat iti notice of violation ti siudad iti Baguio kalpasan a napaay iti panagsukimat iti Environmental Management Bureau ti maymaysa a sewage treatment plant (STP) gapu iti nangato a lebel iti organic pollutants, phosphate, ken mantika iti wastewater.
Sigun kenni Atty. Rhenan Diwas, dadaulo iti CEPMO, na-overload ti trentay singko-anyos a pasilidad gapu iti kinaadu iti narugit a danum a sumsumrek iti daytoy.
Nadisenio ti pasilidad iti 8,600 cubic meters tunggal aldaw ngem dumanon ita iti 12,000 cubic meters ti naproseso iti daytoy.
Mapapati a nagtaud kadagiti restaurant ken dadduma pay nga establisimiento ti mantika a nasarakan iti system, a nakaapektar iti kalidad iti danum a mairuruar idiay Balili River.
Tapno maliklikan ti nadagdagsen a pannusa, karaman ti posible a multa ken panangisara iti pasilidad, nangisayangkat iti siudad iti temporario a panangpasayaat bayat nga agsapsapul iti pondo para iti rehabilitasyon wenno panangsukat iti sewage treatment plant (STP).
Mapatta-patta a dumanon iti P1.2 bilion ti panag-upgrade ti agdama a pasilidad ken P2.9 bilyon met para iti maysa a baro a system.
Agsagsagana met ti siudad iti nabayag a plano tapno mapalawa ti sewer network ken manayunan ti bilang dagiti pagtaengan a konektado iti daytoy agingga iti tawen 2035.
