QUEZON CITY, PHILIPPINES – Napaneknekan a pimmusay dagiti Balikbayan nga agina kalpasan a naduktalan ti bangkay dagitoy a naitabon iti arubayan ti kabagian dagitoy.
Maibasar iti report, naipadamag a mapukpukaw dagiti biktima idi Pebrero 21 nu sadino kasangsangpet laeng dagitoy iti pagilian manipud Japan.
Immunan a naipadamag a nakita ti maleta dagitoy a tumtumpaw iti karayan idiay Tayabas, Quezon.
Naduktalan pay dagiti otoridad a dara-dara dagiti kagawaan dagitoy iti nasao a maleta.
Kabayatanna, inaklon ti kabsat ti biktima nga ina nga isuna ti adda iti likodan ti pammapatay.
Sigun kenkuana, kaduana ti asawa-na ken dua pay nga indibidual a nangbagbagsol kadagiti biktima agingga a pimmusay dagitoy.
Iti inisyal nga imbestigasyon, maitudtudo a gapu iti kuarta ti posible a motibo iti nasao a krimen.
Iti agdama, adda iti kustodiya ti Tayabas police ti babai a suspek bayat a maan-anup pay dagiti daduma a suspek.
