Mapatta-patta a dumanon iti agarup a P35,000 ti balor ti nauram iti 1 square meter a kalawa ti financial management records room ti Department of Public Works and Highways -Cordillera.
Iti ekslusibo a pannakiuman ti Bombo Radyo kenni SF1 Lloyd Ashley Furigay, PIO ti BFP-Baguio, kinunana a naawatda ti tawag pasado 5:25 idi kalman, 5:36 fire undercontrol ken naideklara a fire out iti 5:43 ti malem.
Agtultuloy met ti panagkolektarda iti ebidensya ken ‘samples’ para iti laboratory analysis ti head quarter dagitoy.
Mainaig iti daytoy, kinumpirmar ni SF1 Furigay nga adda dagiti sumagmamano a dokumento a nauram ngem saanda a sigurado nu anya ti nilaon dagitoy.
Kabayatanna, nagkedked ti Department of Public Works and Highways -Cordillera a mangipaay iti statement seknan iti napasamak nga uram iti financial management records room ti nasao nga ahensia.
Sigun iti maysa a personel ti DPWH-CAR, nabilin dagitoy a saan a mangipaay iti impormasion ken ti laeng Central Office ti makaipaay iti anyaman a detalye.
Iti agdama, kinuna ni Furigay nga agtultuloy paylaeng ti imbestigasionda.
