BAGUIO CITY – Nasarakan ti bangkay ti maysa a 10-anyos a balasitang iti rangkis Skyline, Eastern Ampucao, Itogon, Benguet iti agsapa ti Sabado, Pebrero 5.
Iti panakiuman ti Bombo Radyo Baguio, kinuna ni PMajor Mathew Burgos, hepe ti Itogon Municipal Police Station, naireport iti pulisya a mapukpukaw ti nasao nga ubing iti alas kwatro ti malem ti Biyernes, Pebrero 4.
Iti imbestigasyon ti pulisya, napan nagdigus ti balasitang ken ti inana iti communal bathroom iti bunkhouse ti pagnanaedan dagitoy.
Immuna a pimmanaw ti ina ngem nagsubli manen iti communal bathroom kalpasan a saan a simmurot ti anakna.
Nupay kasta, bado laengen ti balasitang ti nadanunan ti ina.
Dagus a nagpatulong ti pamilya kadagiti otoridad isut gapuna a nangipatungpalda ti search operation.
Sigun kenni Major Burgos, nakaawatda ti tawag manipud iti concerned citizen idi agsapa ti Sabado mainaig iti nakitada a bangkay iti rangkis nga addaan kauneg a 50 a metro.
Iti panagresponde dagiti pulis, nadanunda ti lamo-lamo a bangkay ti nasao nga ubing a naka-sako.
Naipasidong iti otopsiya ti bangkay ti balasitang tapnu maamuan ti rason iti ipupusayna.
Innayon ni Major Burgos a saan a nagkitakit ti suspek idi tiniliw daytoy dagiti pulis.
Kinunana a ti inaklon ti 40-anyos a suspek ket ti panangbekkel daytoy iti biktima.
Naamuan pay nga agka-aruba ti suspek ken ti biktima.
