BAGUIO CITY – Naitabonen sadiay Apatan, Pinukpuk, Kalinga ti bangkay ni Corporal Jay Clint Pasingan, ti Cordilleran soldier a pimmusay iti panakirinnupak ti tropa ti gobyerno kadagiti terorista nga Abu Sayyaf Group (ASG) sadiay Bangkal, Patikul, Sulu idi Enero 30.
Naamoan a naipangato pay iti CPL ti ranggo daytoy manipod iti Private First Class ken naiyawat met iti pamilyana ti Medal of Valor kasta met dagiti dadduma pay a pribilehiyo para iti naulila a pamilya daytoy.
Maipalagip a karaman daytoy iti tropa ti militar a nangisayangkat iti all-out offensive operations kontra kadagiti Abu Sayyaf Group kasaruno ti panangsaneb dagiti bandido iti soldado a Tausug a nangitulod laeng kadagiti kakadwana iti pantalan idi pay Enero 26, 2022.
Nagresulta ti operasyon iti panakaparmek ti bandido a ni alyas Omar Yakan iti sidong ni ASG sub-leader Ellam Nasirin ken iti panakakumpiskar ti K3 squad automatic weapon a maatap nga armas ni Yakan.
Kabayatan met ti nasao nga operasyon ket natamaan ni Pasingan a nagresulta iti ipupusayna bayat a nadangran met da Sgt. Michel Bagunu ken PFC Celestino Tano nupay addadan iti natalged a kondisyon.
