Naitabonen ti bangkay ti maladaga a nasarakan idiay Bridal Falls, Camp 1, Tuba, Benguet itay laeng nabiit.
Maibasar iti imbestigasyon ti SOCO Benguet PFU, ti maladaga ket maysa a lalaki, agarup 36 cm ti kinatayagna, ken agtawen iti nasurok 36 weeks gestation wenno ti panawen a mabukbukel (develop) paylaeng daytoy iti tian ti ina daytoy.
Maibasar iti report ti Tuba Municipal Police Station, mangipatpatungpal iti mobile patrolling dagiti kameng ti Tuba Municipal Police Station idi inasitgan dagitoy ti uppat a menor de edad ken impakaamoda kadagiti personnel ti nasao nga istasion nga adda ti nasarakan dagitoy a bagi ti maysa a maladaga.
Maibasar iti salaysay dagiti menor de edad, manarimaan ti panaglangoyda sadiay Bridal Falls idi nakitada ti maysa a banag a nakabalkot iti black plastic ken tumtumpaw iti danum.
Gapu iti saan a nasayaat nga angot ti nasao a banag, inala ken inturongda iti igid ti falls ken nadiskobre dagitoy ti agruprupsa a bagi ti maladaga.///Bombo Genzel Depayso
