BAGUIO CITY – Im-imbestigaran ita ti La Paz Municipal Police Station ti pannakapapatay ti maysa a mannalon a nasarakan a maysan a bangkay iti igid iti waig sadiay La Paz, Abra idi kalman ti agsapa.
Nabigbig ti biktima a ni Rogelio “Boy” Babiera, agtawen ti 47 ken residente iti Bulbulala, La Paz, Abra.
Sigun iti La Paz MPS, nagsagaba ti biktima iti tagbat iti tengnged ken bagsol iti barukong ken tiyanna.
Sigun iti hepe ti La Paz MPS a ni PLt. Ronaldo Eslabra , maysa a mannalon ti nakakita iti bangkay ti biktima iti igid ti waig iti Barangay Bulbulala.
Naduktalan iti imbestigasion a saan a nagawid ti biktima idi rabii ti Nobiembre 16 kalpasan a napan daytoy nakiraep.
Nagkedked ti pamilia ti biktima a maipasidong iti otopsia ti bangkay.
Nupay kasta, ibilbilang ti ama ti biktima kas “brutal” ti pannakapapatay ti anakna ken kinunana nga awan ti ammoda a posible a rason iti napasamak iti anakna.
