BAGUIO CITY – Agpapaimbagen iti ospital ti maysa a Barangay Health Worker a napalpaltogan sadiay Cabaruan, Dolores, Abra idi kanikadua.
Nabigbig daytoy a ni Ana Maria Sagrada Macapagat, 45-anyos ken residente iti nasao a lugar.
Maibasar iti report, nakalugan ti biktima iti tricycle tapnu agawiden manipud iti panagserbina kas duty sentinel iti COVID-19 task force.
Nupay kasta, apaman a nakadanunda iti Okyang Bridge ket killaat a pinalpaltogan dagiti saan pay a nabigbig a suspek ti tricyle.
Gapu iti daytoy, natamaan ti likod ken saka ti biktima a dagus a naitaray iti ospital.
Naamuan a ni Macapagat ket maysa a drug surrenderee ti pulisya.
Agtultuloy met ti imbestigasyon ti pulisya para iti panakduktal ti motibo ti pammaltog ken iti pakabigbigan dagiti suspek.
