Silulukat ti barangay Irisan para kadagiti amin a kandidato nga agkampanya.
Dayta ket sigun kenni Arthur Carlos, kapitan iti Barangay Irisan kabayatan ti panakiuman ti Bombo Radyo kenkuana.
Sigun kenni Carlos, karbengan dagiti kandidato nga agkampanya tapno maipakaamoda dagiti palatapormada ken maikkan iti ideya dagiti botante no siasino ti ibotosda.
Nupay kasta, kiddaw ti kapitan kadagiti amin a kandidato nga ikatenda dagiti tarpaulinsda a saan a nasayaat a nakapaklat nangruna ket daduma kadagiti campaign materials ket maik-ikkat.
Malaksid iti dayta, namnamaenna ti koordinasyon dagiti kandidato, mangabak man wenno saan a tumulongda iti panakaikkat dagiti tarpaulins nangruna ita a masansan ti panagtutudo no sadino mabalin a dagitoy ket maipullat kadagiti kanals a mangitunda iti panaglayos.
